Ityô yam, me pase ne, iwuhe yô ka mtwen, or Un an er anmgbian u nan iwuhe ka nan ia kange kpene kpene a gbihi ye, kape lu kange sha diabolo, yange la za kpela i a Ter mba Mikael zenda un sha tar u Ter sha er a due gema ashe ken sule u Ter, a nenge er Adam kua shi Ifa ve lu ônov her mba yan idyako u uma ken sule u Ter, ngun un hingir bo kpan ken ikyôngo dang iwuhe kende ormee

Tsô Satan wuha iwuhe va kpur sha mbamaren ken Eden, iwuhe hide kange sha diabolo, mimi m ôron ne, alu ijaki ia faityo a nyôr hen ihura nura je kpa ormee yô un a va nyôr tar u Tor Utsoron ga kpa se vor u Adam yô Yesu paa se ityough, mba ve rumun a Yesu cii, ka yemen tar u iferor fa er un a yange se u la

Iwuhe jim ka kyar u ihom, shi iwuhe i senden ityough, i keren u van a kwaghbo sha anmgbian u genegh, u bunden kwagh u dedoo sha ci u or genegh, or eren we iwuhe ka orihom ne ungwa kpa? Kape ilu ve se yer orihom, Satan yange lu er se iwuhe, mba eren iwuhe ve kegh ato, i ka mtuhwem, anmgbian u doon mo er sulugha, ga yô kwaghbo u u lu henen wer a va tser anmgbain u genegh ne, ka sha ityough you un a va hide ye

U er dang yô ka iyol you, yange la mbaiwuhev ve zua sha u senden Daniel a tor yô, ve fa er ilu mtwem ga yô u nar sendegh er saa ku sha zwa u begha akpe ye, gema lu ve ve va kpe ku shon ye, kape mbaiwuhev kumba ikyon ve wa ilyô-usu sha Un anden akar a Daniel ve, i va lu ve i nande ken u ne, shile u mbaiwuhev ve hônon gbem ka un a wuan ve

Ahoo! Mo yô m rumun a kwagh u, uma ve kaa er, u za u timen ihungwa i orihom yô time di laa, i de zan kpishi yum ga, ci u a doo ga alu we u hide u va gba di shin i Haman, kav ga tsô a mough za tim kon geeng, ci u senden orihom, Modekai a va kume iusa u unden u, pe za kpe sha kon u a tim ave na ne

Ungwa me ôr, ne uuma injakwagh ne, yange tor lu, shi anicôgholov lu hen tar u tor ne, er vea za hen tor yô tor yange a na ve kwagh sha ci u ve ya, ve ya ve ma kwagh, vea mough u yemen yô ve ôr tor kwagh, wea er a doo kpa ka iyol you, wea er a vihi kpa ka iyol you tor u er jim ye

Tsô iyange i genegh, tor nungwa icigh ken akpekpa na ve, ve kera ya ga ve kusu ve kimbir imo ne a tor, ve due u yemen a mi vea za ya, je kpa sha gbenda yô lu wan u tor jim vôr gande ve gema geedee ve na wan, wan ya man nyôr hen tor u kinen, ahii ka ku na tor, u er dang yô ka iyol you ka ie mayange ga

Anmgbianev, iwuhe ia faityô u yangen kwagh u Ter a ver ciki u anmgbian ugen la ga,Yakob yem shir hen Laban, lu kuran ilev mbi Laban, Laban tôndo zwa er, mbi a mar mbi pupuu seeng yô Yakob a ver mbila ka mbi nav, Aôndo na iveren, ilev mough u maren mbi pupuu, iwuhe kende Laban, kôr gema zwa, iveren i Tor wase kpa man gema, mba eren iwuhe ve men i, Ter wase rumun i ga

Iwuhe, anmgbianev iwuhe ka mtwen, or u nan eren i yô ka sha nan, ia hide emememe er ngise hide sha ormee, Jijingi zenda iwuhe ne ken avese sha i de timin se ga