Ngise or ugen lu mir zegeiniongo sha won, iniongo i kwasehe. A sôngo ilev kpishi yôr iwer, been yô a tindi orlôhôn.
Tsô or la kpa er tom na lôhô ahuraior, ken tar la kua mba yôugh yôugh kpa or môm môm tsô va yar iniongo ga, ci u ishule man kasev vev, kua inyaregh, man shi atimbir agen kpishi aa na ve ian ga yô.
Ve va or-iniongo ahenge ishima i vihi un, tsô a tindi ortyom a ishimaivihin, u za lôhôn mbagbanjime a za lôhô ior, mbaatsanev kua mbaawanev, ve za nyôr iniongo la iv gbing, ve gba yan man ember, kpa mba ve bunde la mô nyôr, ken iember la ga
Injakwagh ne lu Ter Yesu je ôr iyol Na, lu sha kwagh u tartor u tsôron; i lu ci u tar cica, mbavendan Ter man se mbadondon Un. Kegh nen ato, se ungwa nen ityesen i Tor u Uma tese se ken injakwagh ne, er se kav awashima Na ve se dondo imo Na yô
Or-iniongo la ka Tor Utsôron, A wua Waniyôngo Oryiman Yesu yôr tar ne iwer sha. A tindi Or-lôhôn iniongo ka Jijingi u Ter. Ngu lôhôn gbem sha ikyov ikyov, sha imo i mbadondon Ter, er we tar, de timbir ga, se yem iniongo i uma utsôron sha
Ior mbagen i lôhô ve iniongo ne kpa mba vendan, nan atôakyaa a yangen ve: mba mo yô ka kwase wam, mba mo di yô ka ican, mo yô ka ikyôm, mo yô ka ônov, mba mo kwagh sarem yum me za kange iyol yam ken Kristu sha won ga
Lan ishima ior mbagen yô mba vendan u yaren Aôndo Tor iniongo ci u tahav, icivir man kwaghfan, man iengem i Yehova Ter A ne ve yô. Mba nahan tar yan man ember yagh yagh ken tar u timin ne
Mfega ne wa ime tsô, anmgbianev kpishi mba vendan u zan, iniongo ne sha ci u ve mba ior mbaperapera, je hemba a hemba mba zan ken iniongo la cii; mba kaan er mo m uve, ityou ken isholibo yum ian kar; mbagen venda kwagh u Yesu sha ci u kwaghaôndo jim kpa ka gbilinkwagh, man tartor kpa ngu je ga, Bibilo jim kpa ka umace ve nger ye
Mba vendan, hii ken tar u Mbayuda je i va nyôr hen tar u Tiv hegen, zever yô Tor na Jijingi ngu masen yôôn er: mbaitseeveyol va nen, ne mba vôron, shi ne mba ikyav i yoho ne cii, va nyôr nen amar, ken ya utsôron, ngohol nen mmem, man iember i gbem
Umace kaa er, or u nan yer u yô or la hemba u; Aôndo hemba se shagba kua tahav, man kwaghfan, A yilan se ikyenge ikyenge je er se za amar Na ye. Wea venda iniongo Na u za tim! Shi kende iember i botar u timin se yem iniongo i uma utsôron sha
Ter Uhembanagee, Ter wase Aôndo se ior mba se yen agee yô se rumun u zan amar Ou. Yô suwe se Ter se za ya kon u uma, iwer i iniongo i uma utsôron la. Se shav amar sha a mbatomov ken mmem utsôron, wuese Shagbator a iember ken Yerusalem u gbem. REV. SOLOMON IORNENGE DAMISA – NKST ISAKO KELASE U WANNYAM Vol. 17 Side B [CD Vol. 21]