Ka mea gba ningir, shin tar, Tor, iyol i kundem ker nengen, a iwo man azem inyam i tamen guukuku ker, uumace, guukuku

U wa inyon a kper, ngi purugh, orumace ngu a akper ga, kpa se purugh je se aver, ape inyon a za nyôr, m pine ishima yam imbya kwaghfan ne ana lu na se? mrumun wase ngu di môm tsô, ka We Tor, Ter, U ne se kwaghfan ye

Hen ape ka Wea na ga la or, tsô nan a fa ga, se norom kpa ka ibume ican, se a ôr, kpa a lu ie purututu

We kwaseuya kaa ase se, nyi wan u mara? Alu u kwase shin u nomso? A fa ga cii, a gba va maren, kpa ka mbakôronmar a vande fan ve a gba, ôron un tiôr ye

Iyange i maren jim, kpa kwase a fa ga, pine nom u nan, kpa nan a fa ga, i wuese, Tor gbem

Kpatema a kôr ihev, ngu vanden yan ityough, iyôn i kohol iyiav a vande yan ashe na, er a ombo wua a ikyuleke, kpa ngu vanden yan abun keng keng. Tor u tsôron ka an nan, tesen ve kwaghfan jimin?

Iyôn er sev u av, ve due tange, mba keren, kwaghyan u a va ya yô er za zough a kwaghyan u a gande u tôôn yô, ngu a ya zwa na tsô a gba hiden, sha u za lôhôn mba ken ya na cii ngu a za zuan a ugen yô, lam sha ieren, ka vea zua zwa ve fa fese er ngun ya kwagh ndor ndor, ka karen gban sha hwange la, sha ihuma sha ihuma ve gba yemen, mba za zuan her ityough imôngo yô ka burun yemen, amin shin zwa ve

Alu ura a, nôô kpishi wua a ndôhor ua mor yum, iyôn ka a va tsen, iyange a bee, ngu kuran koson, se uuma kpa mbagen faityô u koson kwaghyan je ga

Hur ngu a mba eren ityom kposo kposo, ngu a mbamaan, un ya kua ashoja, man mbanengen un sha ngô, kua uyese mba ve yesen un ônov, kwaghyan na kpa ye ken won ga, ngu a maa inya a imbishi gbing, ga yô mbaihomov, vea wua, un cica

Hur a gba yaren tom, ashoja, a hemen, mbatôôn-ikav vea dondo, mbagen a mase, ka an nan, kaa ve er mba yarenoo? M za uvan yô, m ungwa, ashoja gbidye imemegh, hur num ayem mba yemenoo! Kwagh u kpiligh iyol ka an, nan tese ve kwaghfan ne, Tor u tsôron? Ka We Tor, Ter, U ne kwaghfan ye

Er iyange i marem iyev, je m numben hen vulevu, sha won mngu nengen, a ityom i Aôndo je kpa been ga, zan zan, igen yô ashe ase a nenge ami ga, shi igen yô se nenge a mi kpa, saa se a wa ajingi

I wuese Ter Aôndo gba sha A kua tar, Shagbator Ter wase U kuma iwuese